УЈП ПРЕДУПРЕДУВА: Платете данок за личен доход за 2023 и избегнете присилна наплата

Даночните обврзници, 4.767 на број, кои го пречекориле законскиот рок и не ја намириле даночната обврска која произлегува по данокот на личен доход за 2023 година – да го платат својот даночен долг, повикуваат од Управата за јавни приходи. Во спротивно, ќе се прстапи и кон присилна наплата.

„Согласно евиденцијата на УЈП, ве информираме дека 4.767 даночни обврзници ја немаат платено разликата за доплата на данокот на личен доход утврдена во Годишната даночна пријава за утврдување на данокот на личен доход (ДЛД-ГДП) за 2023 година што требаше да се плати ВО ЗАКОНСКИОТ РОК до 30.06.2024 година“, се вели во објавата на УЈП.

Како што информираат од Управата, во следниот период УЈП ќе премине кон опоменување и присилна наплата на доспеаните неплатени долгови, што ќе доведе до дополнителни трошоци по основ на камата за задоцнето плаќање од 0,03 проценти дневно и еднократна посебна такса во постапка на присилна наплата.

Исто така, УЈП ги поттикнува обврзниците со даночен долг од над 10.000 денари, кои се соошуваат со тешкотии во обезбедувањето на тековната ликвидност и платежна способност, а редовно ги исполниле другите даночни обврски, да поднесат барање за одложено плаќање.