Реалната добивка на „Адинг“ ја надмина планираната за 464,6 насто

Позитивни движења бележи „Адинг“ во одработените први три месеци од годинава. Продажбата на домашниот и на странските пазари постигнува добри резултати, што влијае врз зголемувањето на приходите. А, и добивката пред оданочување е повисока за повеќе од 52 проценти.

Компанијата која произведува и продава хемиски материјали за градежништвото, на име приходи од јануари до март инкасирала 167.644.000 денари, односно 2,7 милиони евра. Или, за 23 насто повеќе во спредба со ланскиот прв квартал. Во структурата доминантни се приливите од продажбата – 165.080.000 денари (2,68 милиони евра). Овие средства претставуваат 98,5 отсто од вкупниот приход. Во тие рамки, 85,8 отсто се од домашно потекло, додека 14,2 проценти се приходи остварени од продажбата на странските пазар.

Зголемување е регистрирано и кај расходната страна. Во однос на споредбениот период трошоците се повисоки за 21,3 проценти и изнесуваат 121.008.000 денари (1,96 милиони евра).

Оттаму, „фармацевтите“ во градежништвото направиле добивка, која пред оданочување изнесува 55.666.000 денари или над 904 илјади евра. За 52,4 проценти поголема од минатогодишните 36.524.000 денари. И, за 464,6 насто повеќе од планираниот профит, кој бил зацртан на 9.860.000 денари, односно на нешто повеќе од 160 илјади евра.