На 24 ноември ќе се блокираат сметките на компаниите за неплатениот „солидарец“

Од 150 даночни обврзници, 98 ја платиле еднократната давачка што произлезе како обврска од Законот за солидарен данок. Или две третини од компаниите, па приливот по оваа основа е 36 милиони евра, односно половина од износот што го планираше Владата. Неплаќачите се соочуваат со можноста од блокада на сметките, што ќе се изврши на 24 ноември, информираше директорката на Управата за јавни приходи, Сања Лукаревска.

Во текот на наредните денови сите тие кои не ја намириле обврската прво ќе добијат опомена. „Бидејќи рокот беше до 25 октомври, за сите кои немаат направено плаќање на данокот на солидарност ќе се преземат мерки согласно Законот за даночна постапка. На шести ноември ќе ги доставиме опомените. Доколку и по тоа не направат уплата, на 24 ноември ќе пристапиме кон блокирање на нивните сметки“, нагласи Лукаревска, појаснувајќи дека според Законот за даночна постапка не можат да ги објават имињата на компаниите – должници, но потврди дека меѓу нив има и јавни претпријатија.

Солидарниот данок, кој е неприфатлив за бизнис заедницата, во моментов е во Уставниот суд, бидејќи Стопанската комора поведе иницијатива за негово оспорување. Како што вели Лукаревска, ќе ја почекаат судската одлука, по што ќе утврдат како понатаму ќе постапуваат.