ВЛОЖУВАЊЕТО ВО АКЦИИ НОСИ ПРОФИТ – Добивката на „Раде Кончар–Апаратна техника се вивна за 118%

За 117,9 проценти е повисока добивката на акционерското друштво „Раде Кончар – Апаратна техника“ – Скопје остварена во периодот од јануари до септември. Во споредба со минатогодишните достигнувања значителен раст има и кај приходите. Најголемиот дел од напредокот е постигнат по основ на акционерството, односно преку вложувања во хартии од вредност.

За девет месеци друшто бележи нето-добивка од 28.491.503 денари или 463,3 илјади евра. За споредба, лани износот бил 13.075.000 денари, односно 212,6 илјади евра. Вкупните приходи, пак, се 36.500.595 денари (593,5 илјади евра).

„Ваквиот позитивен финансиски резултат се должи на остварените приходи по основ на капитална добивка од продажба на хартии од вредност, наемнини и прихои од исплатени дивиденди остварени од добивката во 2023 година од друштвата во кои Акционерското друштво има свои вложувања“, појаснуваат од компанијата.

Од друга страна, трошоците се намалени за 21 отсто и се во износ од 6.129.092 денари (99,6 илјади евра).

Од „Раде Кончар – Апаратна техника“ укажуваат дека менаџментот се стреми кон намалување на расходите и остварување подобри финансиски резултати. Во тој контекст се и очекувањата дека добивката и натаму ќе се зголемува „по основ на финансиски приходи од дивиденда и капитална добивка од пласирани средства во хартии од вредност“, зашто заложбата на друштвото е да се оплоди капиталот и да се зголеми финансискиот резултат.