Владата се приближува до препораките на експертите – Чебрен и Галиште да ги гради државата

   По серијата обиди и пропаднати преговори и тендери, хидроенергетскиот проект Чебрен и Галиште би можел да се реализира самостојно од државата, без вклучување приватен партнер, најави премиерот Христијан Мицкоски, посочувајќи дека Владата е блиску до конечна одлука за ваков пристап.

Според проценките, вкупната вредност на инвестицијата би достигнала околу 1,5 милијарди евра, додека анализите покажуваат внатрешна стапка на поврат повисока од 10 проценти, што го прави проектот економски оправдан.

Премиерот нагласува дека се работи за стратешки проект, не само за Македонија, туку и за целиот регион. Покрај зголемувањето на производството на електрична енергија, како уште поважен ефект ја посочува можноста за создавање два големи резервоари на питка вода, што, според него, има суштинско значење во контекст на климатските промени.

„Една од иницијативите што ја имаме е сами како држава да го градиме целиот тој комплекс на централи на реката Црна над постоечката Тиквеш, во јавноста познат како проект Чебрен и Галиште. Направивме пресметки и цениме дека ова е стратешки проект, не само за Македонија како држава, туку и за регионот“, рече Мицкоски.

Тој додаде дека досегашните обиди со приватни партнери и тендери не дале резултат и често биле проследени со сомнежи, поради што се разгледува модел на самостојно финансирање, евентуално со поддршка од меѓународни финансиски институции.

„Доколку успееме да формираме синдикат на меѓународни финансиски институции, а разговорите се во таа насока, тогаш реално е да се очекува дека следната година ќе ставиме камен-темелник на овој историски проект…“, истакна премиерот, додавајќи дека производството на електрична енергија во овој случај не е примарен, туку спореден ефект во однос на водните ресурси и наводнувањето во регионот.

Години наназад се правеа обиди за привлекување инвеститори грчки, американски, од ОАЕ…, но поради низа причини, меѓу кои и неприфатливи условувања, активностите останаа без завршница. И покрај тоа, властите постојано опстојуваа на ставот дека државата нема капацитет самата да застане зад реализацијата на проектот. Наспроти експертите кои инсистираа(т) дека тоа мора да се направи самостојно.

Во тој контекст беше и иницијативата на Здружението на инженери, пред две години упатена до Владата и до Собранието, Чебрен да се изгради со сопствени средства, со образложение – не за јавно–приватно партнерство, бидејќи станува збор, пред се, за водостопански, а потоа за енергетски проект.

Целта на ицијативата беше активностите на државните институции кои ќе бидат делегирани за спроведување на овој капитален проект од стратегиски интерес за државата, да се стават во законски рамки за да се овозможи непречена реализација, без оглед која политичка партија ја формира владата. А, при носењето на одлуките, да се води сметка за суверенитетот и територијалната целина на државата.

Исто така, тогаш од Здружението истакнаа: реализацијата на овој проект е предизвик, а државата има капацитет да го изведе преку „интелигентно финансиско управување“; и укаѓаа – проектот е економски исплатлив и општествено корисен од енергетски, водостопански и социјален аспект.