УЈП: Работодавачите ја исплатуваат јануарската плата со задоцнување

Исплатата на платата за јануари се одвива и по истекот на законскиот рок, 15 февруари. Заклучно со уплатите извршени на 17-от ден од вториот месец, обврската ја реализирале 85,5 отсто од работодавачите, а платата легнала на сметките од 96,1 процент од вработените. Податоците се од Управата за јавни приходи.

„За месец јануари 2025 година, обврска за исплата на бруто плата имале вкупно 70.322 работодавачи за 550.001 вработено лице. Бидејќи законскиот рок 15 февруари се падна во сабота, земајќи ги уплатите до 14 февруари, МПИН пресметките ги платиле 46.525 работодавачи (66,2%) за 468.490 вработени лица (85,2%).

Земајќи ги во предвид и уплатите на 17 февраури, МПИН пресметките ги платиле 52.384 работодавачи (74,5%) за 496.778 вработени лица (90,3%). Ова покажува дека исплатата на платите продолжува со задоцнување и после рокот 15 февруари. Така, согласно последната состојба на МПИН уплати, а заклучно со датум 04.03.2025 година, за месец јануари 2025 година МПИН пресметки поднеле и платиле вкупно 60.118 работодавачи или 85,5% од работодавачите за 528.418 вработени, што е 96,1%“, наведено е во соопштението од Управата, при што се наведува дека не е точен податокот дека 80.000 вработени не ја зеле јануарска плата.

Од УЈП посочуваат: „Заклучно со 04.03.2025 год. МПИН пресметката не ја платиле 4.307 работодавачи што е 6,1% за 11.504 вработени лица што е 2,1% од вработените, додека 5.897 работодавачи, односно 8,4% за 10.079 вработени лица (1,8%) сè уште не поднеле МПИН пресметка за месец јануари 2025 година“.

Мерките за присилна наплата на УЈП се во тек, па се очекува да продложи наплатата на преостанатите долговни износи.

За споредба, од Управата ги презентираат и ланските податоци за јануари: обврска за исплата на бруто-плата имале 70.020 работодавачи за 469.343 вработено лице, а во законскиот рок до 15 февруари 2024 МПИН пресметките ги платиле 47.795 работодавачи (68,3%) за 468.490 вработени лица (85,2%).

„Управата за јавни приходи редовно го следи и известува за трендот на исполнување на даночните обврски. Според последната анализа споредбено на месечно ниво податоците за работодавачите кои исплаќаат плата во законскиот рок и работодавачите кои исплаќаат плата со задоцнување се на приближно исто ниво и податоците не се разликуваат драстично од месец на месец“, пишува во соопштението.