Тајвански „Јагео“ доаѓа со инвестиција од 205 милиони евра

Договор за нова инвестиција од 205 милиони евра ќе потпише директорот на Дирекцијата за технолошки индустриски развојни зони, Јован Деспотовски, со тајванската компанија „Јагео.

Ова е најголемата гринфилд инвестиција во земјава од осамостојувањето, која ќе отвори околу четири илјади работни места. Како што известува МИА, производствените погони на „Јагео“ ќе бидат лоцирани во ТИРЗ Скопје и во ТИРЗ Штип.

Церемонијата на потпишувањето ќе се одржи во седиштето на компанијата. Предвидено е поздравни обраќања да имаат директорот Деспотовски и претставник на компанијата, а потоа, преку видео-конференциска врска, се очекува да се вклучи и премиерот Димитар Ковачевски.

Делегацијата што ја предводи Деспотовски утре ќе ја посети фабриката на „Јагео“ во Каошунг.

Компанијата е основана во 1977 година и денес се смета за еден од најголемите глобални добавувачи во автомобилската индустрија, зелената енергија и електрониката за широка потрошувачка (5G и телекомуникации). Има 29 продажни канцеларии, 49 производствени локации и 20 центри за истражување и развој во 24 држави во Азија, Европа и САД, а брои 40.000 вработени.

На Тајванската берза котира од 1993 година.