СКСМ и ФИТР ги стимулираат истражувачките активности и иновациите во приватниот сектор

Јавниот повик за инструментот за поддршка – Кoфинансирани грантови за комерцијализација на иновации беше презентиран пред членовите на Стопанската комора, која во соработка со Фондот за иновации и технолошки развој организираше виртуелна инфо сесија.

Целта е да се поттикнат истражувачките активности и развојот во приватниот сектор преку соработка со високообразовните институции и научно-истражувачката дејност. Но, и да се стимулираат сите форми на соработка за комерцијализација на иновациите. Зашто, на крај поддршката ќе ја добијат проекти со јасна комерцијална цел и се во фаза на прототип, или во соодветна фаза, зависно од видот на иновативниот производ, услуга или процес, а се до пред-комерцијална, односно пред-пазарна фаза.

Се работи за поддршка која поединечно може да достигне максимален износ од 20 милиони денари, обезбедена од ФИТР, со која се обезедува финансирање до 70 или до 60 отсто од вкупниот буџет на проектот. Тоа, зависно од бројот на вработени и од годишниот приход остварен во последните две години. Или, за претпријатија со најмногу до 50 вработени и годишен приход во посочениот период помал од два милиони евра, предвидено е финансирање до 70 проценти. А, пак, за оние кои вработуваат од 50 до 250 лица и остваруваат годишен приход над два милиони евра, но не повеќе од десет милиони евра, финансирањето е до 60 отсто од вкупниот буџет на проектот.

Рокот за аплицирање е до 10 јули.