Штедни книшки со награден депозит од Комерцијална банка за тројца средношколци од „Васил Антевски Дрен“

Комерцијална банка им ги додели штедните книшки на тројцата ученици од средното училиште „Васил Антевски Дрен“ од Скопје како награда за нивните есеи на тема штедење. Главниот финансов директор и член на Управниот одбор на Комерцијална банка, Маја Стевкова Штериева, им ги врачи штедните книшки со награден депозит од 6.000, 4.500 и 3.000 денари, соодветно, на Виктор Ристаноски, Деа Денковска и Ана Трпевска, кои по по повод Светскиот ден на штедењето – 31 Октомври ги напишаа најдобрите есеи низ кои ги пренесоа своите размислувања и сфаќања за потребата, предноста и начинот на кој младите треба да го прифатат штедењето како добра и корисна навика.

Директорката Штериева им ги честита наградите и им посака тие да бидат почеток на нивниот иден успех на полето на личните финансии, не само во професионалниот развој туку и во секојдневниот животот. Таа истакна дека е импресионирана од начинот на кој тие ја сфаќаат значајноста на финансиската писменост и очекува од нив да продолжат да освојуваат нови знаења и вредни искуства, кои ќе им помогнат да бидат успешни млади луѓе.

Директорката на средното училиште „Васил Антевски Дрен“ Тања Јовановска, ѝ се заблагодари на Комерцијална банка за соработката, а на своите ученици им посака да останат посветени на својот личен развој и да бидат горди што се наградени од компанија која важи за една од најуспешните во земјава.