Пругата до Бугарија можеби ќе се догради со 175 милиони евра заем од ЕБОР

Државен заем од 175 милиони евра за доизградба на дел од европскиот железнички Коридор 8 е можноста која ја разгледува Европската банка за обнова и развој. Доколку дојде до одобрување, средствата би се искористиле преку Јавното претпријатие за железничка инфраструктура, со намена – завршување на последната делница од железницата на источниот крај на овој Коридор.

Со парите од заемот би требало да се финансираат изградбата, сигнализацијата и телекомуникациите од Крива Паланка до бугарската граница, во вкупна должина од 23,4 километри. Исто и електрификацијата на целата источна железничка пруга, вклучувајќи ги делниците 1, 2 и 3 во вкупна должина од 88 километри.

„Со финансирање на изградбата на третиот преостанат дел ќе се воспостави првото поврзување на македонскиот железнички транспорт со бугарската железничка мрежа, ќе се олесни меѓународното/транзитното движење на стоки и луѓе, особено со соседните земји на ЕУ и Турција, ќе се придонесе за префрлување на сообраќајот од патен на железнички транспорт преку подобрување на конкурентноста на железничкиот сектор. Проектот ќе ја зголеми и безбедноста и сигурноста во сообраќајот и за патниците и за товарот, ќе понуди можности за развој на бизнисот во близина на железничката пруга и станиците и ќе ги подобри еколошките услови во населените места и регионите опфатени со проектот“, наведено е во соопштението од ЕБРД.