Уште еден моден гигант ја „сели“ продажбата на интернет?

Foto: Shutterstock

Во средината на јули, информиравме дека водечките трговски брендови за облека, како што се „Zara“, „H&M“ и „Stradivarius“, планираат да се фокусираат на продажба преку интернет, како единствената опција за купување која беше достапна за време на долгиот карантин. Овие брендови изгубија милиони, но сепак опцијата за продажба преку интернет ја гледаат како можност за опстанок.

Овие брендови ја гледаат иднината во интернет продажбата, исто како и „Nike“, кој профитираше над очекувањата за време на кризата. Шведскиот моден ланец „H&M“ објави претходно дека планира да затвори 250 од своите 5000 продавници ширум светот, што е 5% од капацитетите, а сега е време идејата полека да се реализира.

Од следната година, земјите на целата планета ќе останат без некои физички продавници за „H&M“, додека приоритет ќе се даде на купувањето преку интернет, што сепак е од интерес. За потсетување за време на пикот на пандемијата, овој бренд беше принуден да стави катанец на дури 80 проценти од своите продавници.

Компанијата забележа раст на продажбата во третиот квартал, но во септември повторно падна за пет проценти. Според проценките на „Бизнис и мода“, глобалната индустрија за мода, облека и чевли ќе има помеѓу 25 и 30 проценти загуби поради пандемијата и кризата.