Мицкоски: Пречките се надминати, третата делница од пругата кон Деве Баир во развоен процес

Третата фаза е во процес на развивање, битно е дека сите пречки од минатото што се случуваа се надминати, постигната е согласност со нашиот источен сосед, изјави премиерот Христијан Мицкоски, за активностите кои се одвиваат на проектот за изградба на третата делница од пругата кон Бугарија од Коридорот 8. За таа цел Владата донесе одлука за активирање на грант од Европската инвестициска банка, како техничка поддршка за ревизија на основниот проект. Потоа ќе уследи тендер за градежните работи.

„Третата фаза ќе биде од големо значење за нас како држава. На тој начин ќе ја потврдиме нашата цел да бидеме крстосница на многу значајни паневропски коридори 8 и 10. Третата фаза е во процес на развивање. Битно е дека сите пречки од минатото што се случуваа се надминати, постигната е согласност со нашиот источен сосед. Нашиот дел, со одлуката на Владата да се активира грантот што значи техничка поддршка од страна на ЕИБ значи дека и ние почнуваме со овој проект. Техничката поддршка значи ревизија на основниот проект, ревизија на целосната документација и потоа објавување јавен повик за изградба на третата фаза“, наведе Мицкоски, кој денес изврши увид на градежните активности што се одвиваат на државниот пат А2, обиколница „Крива Паланка“.

Како што истакна, со тоа ќе се заокружи целата делница од Куманово до границата со Бугарија, која е дел од Коридор 8.

„Коридорот 10 е дел од проектот којшто го имаме со Владата на Обединетото Кралство, и тука сме во напредна фаза. Така што убави вести, убави моменти ќе има за Македонија и граѓаните во периодот којшто следи“, најави Мицкоски.