КОЈ ЌЕ ПЛАЌА ДДВ ЗА НАРАЧКИТЕ ОД ТЕМУ – операторите или граѓаните?

Граѓаните, како и досега, ќе ги преземаат своите нарачки од Тему, без дополнителни плаќања. Во цената е пресметана стапката на ДДВ, а уплаќањето на тие средства е обврска на овластениот шпедитер или поштенски оператор.

За разлика од ставовите на одделни експерти, дека никој нема да се откаже во својата добивка за сметка на лицата што прават нарачки и примаат пратки, Министерството за финансии информира дека усвоените измени и дополнувања на Законот за ДДВ нема да се рефлектираат врз граѓаните. Во продолжение, интегралното соопштение:

„Министерството за финансии информира дека усвоените измени и дополнувања на Законот за ДДВ нема да влијаат на начинот на кој граѓаните ги преземаат своите пратки од странство, вклучително и оние нарачани преку платформата ТЕМУ.

Пратките кои граѓаните ги порачуваат од ТЕМУ и досега имаа пресметан ДДВ во цената на производот. Истата практика продолжува и по измените на законот – ДДВ ќе остане вкалкулиран во цената на производот, како и досега.

Тоа значи дека граѓаните нема да плаќаат ништо дополнително при прием на пратката, ниту ќе има нова обврска за уплата.

ДДВ кој е веќе пресметан во цената кон државата го уплаќа овластениот шпедитер или поштенскиот оператор со кој платформата има договор.

Министерството за финансии уште еднаш потенцира дека со законските измени не се менува начинот на прием и царинење на пратките.

Собранието ги изгласа измените и дополнувањата на Законот за данок на додадена вредност, со кои се укинува ослободувањето од ДДВ за онлајн пратки со вредност до 22 евра.

Целта на овие законски измени се зајакнување на домашната економија, поддршка на локалните компании и создавање нови работни места.

Оваа измена претставува значаен чекор во заштитата и развојот на домашната економија, особено во услови на интензивна глобализација и раст на дигиталната трговија и ќе придонесе за намалување на сивата економија.

Досегашниот систем дозволуваше можни злоупотреби – увоз на стоки ослободени од ДДВ кои понатаму се продаваа на домашниот пазар. Новите законски решенија ја спречуваат оваа пракса и обезбедуваат фер и контролирана пазарна средина.

Со усвојувањето на измените, државата испраќа јасна порака за поддршка на компаниите што создаваат додадена вредност, инвестираат во развој и отвораат нови работни места во земјата“.

Со измените, од идната недела за сите нарачки од странство во висина до 22 евра, кои досега не подлежеа на даночна стапка, ќе се плаќа 18 насто ДДВ. Тоа се однесува на нарачките од сите онлајн платформи, како Тему и АлиЕкспрес. Експертите сметаат дека тоа ќе го платат крајните корисници. Конкретно, шпедитерите и операторите износот за ДДВ нема да го плаќаат од својот џеб, туку процените ќе се вградат во цената на чинење.