Инвестиција од 100 милиони евра за изградба на четири системи за наводнување на 13.650 хектари земјоделско земјиште

Со 100 милиони евра ќе се изградат четири системи за наводнување по сливот на Вардар – Страиште, Лисиче, Конско и Пепелиште, кои ќе опфатат 13.650 хектари земјоделско земјиште. Проектот ќе се реализира со поддршка од германската КФВ банка, 80 милиони евра заем и 2,8 милиони евра грант за поддршка на земјоделците и земјоделските задруги во областите опфатени со хидросистемите. Тоа се 70 отсто од потребните средства, а 30 проценти се обезбедуваат од државниот Буџет.

„Овие четири системи за наводнување се дел од Програмата за наводнување на Северна Македонија и се протегаат по сливот на реката Вардар. Станува збор за Хидросистем ‘Лисиче’, кој ги опфаќа земјоделците од општините Велес и Чашка и би обезбедил наводнување за 3.650 хектари земјоделско земјиште. Потоа Хидросистем ‘Пепелиште’, кој ги опфаќа земјоделците од општните Неготино и Демир Капија, со наводнување на површини од 3.000 хектари. Третиот важен проект е Хидросистем ‘Страиште’, кој ја опфаќа општина Валандово наводнувајќи земјоделска површина од 1.500 хектари. Четвртиот проект е Хидросистем ‘Конско’ кој опфаќа наводнување на 5.500 хекатари земјоделско земјиште од општините Гевгелија, Богданци и Дојран“, образложи министерт за земјоделство Љупчо Николовски кој го потпиша Договорот со меѓународната консултантска компанија „Consulting engineers Salzgitter“ (ЦЕС).

Договорот потпишан со консултантската компанија е во износ од 9,1 милион евра и предвидува изготвување главни проекти за иградба на четирите системи, подготовка на документација, распишување постапка за изградба, надзор и имплементација. Физибилити студиите се веќе изговени, а направена е и проценка на еколошкото влијание на системите.

„Имплементацијата на Програмата за наводнување во нашата земја ќе овозможи создавање на модерни и ефикасни системи за наводнување кои ќе го зголемат хидропотенцијалот и обемот на земјоделското производство и ќе ги намалат економските загуби“, нагласи премиерот Диитар Ковачевски, кој присуствуваше на потпишувањето на Договорот. Како што потенцира, „реализацијата на оваа Програма е во линија на нашите заложби за создавање модерно земјоделство по европски терк, со што ги решаваме децениските проблеми на нашите земјоделци“.