Илјадници Поршеа и Фолксвагени запленети од американските цариници, има сомнежи дека се произведени со присилна работа на Ујгурите во Кина

Илјадници луксузни автомобили VW се запленети од американските цариници поради дел поврзан со наводите за принудна работа во кинескиот регион Ксинџијанг, објави Фајненшел Тајмс.

Американските власти заплениле и истражуваат илјадници европски луксузни автомобили од брендови како Порше, Бентли и Ауди поради наводите дека ги прекршиле законите со кои се забранува увезена стока направена преку принудна работа во Кина.

Според Фајненшл тајмс, германскиот производител на автомобили Фолксваген, кој ги опфаќа компаниите како Порше, Бентли и Ауди, одлучил да ги одложи испораките додека се заменат електронските компоненти за кои постои сомневање дека го прекршуваат законот.

Процесот може да трае до крајот на март, поради бројот на вклучени возила.

Фајненшл тајмс цитира две лица со знаење за ова прашање, кои наводно рекле дека иако Фолксваген не знаел за потеклото на деловите што треба да се заменат, ги предупредил американските власти штом нивниот добавувач ги известил дека доаѓаат од западна Кина.

Според американскиот Закон за спречување на ујгурската принудна работа (UFLPA), увозот од западниот кинески регион Ксинџијанг е забранет поради претпоставка дека е направен со принудна работа.

Канцеларијата за човекови права на ОН соопшти дека кинеското дискриминаторско приведување на Ујгурите и другите претежно муслимански етнички групи во регионот може да претставува злосторство против човештвото.

Кинеската комунистичка партија постојано ги отфрли овие наводи.

Неодамнешниот извештај на Human Rights Watch предупреди претходно овој месец дека многу производители на автомобили би можеле да користат алуминиум произведен со принудна работа.

Портпаролот на Фолксваген изјави дека компанијата „многу сериозно ги сфаќа наводите за кршење на човековите права, како во компанијата, така и во синџирот на снабдување. Се разбира, ова ги вклучува и сите наводи за принудна работа“.

„Кога добиваме информации за ризици за човековите права или потенцијални прекршувања, се стремиме да ги отстраниме што е можно побрзо“, велат од Volkswagen. „Штом добивме информации за наводи во врска со еден од нашите под-добавувачи, го истражувавме случајот.

Компанијата додаде дека на крајот од истрагата ќе постапи соодветно, што „може да вклучи и прекин на односот со добавувачот доколку нашите истраги потврдат сериозни повреди“.

Фолксваген претходно соопшти дека ја разгледува иднината на своето заедничко вложување со кинескиот производител SAIC Motors, со кој поседува фабрика во главниот град на Ксинџијанг, Урумчи.

Ова не е прв пат Volkswagen да се поврзува со принудната работа на Ујгурите.

Германскиот весник Handelsblatt, наводно, добил фотографии на кои се прикажани работници од Ујгур во воени униформи за време на тригодишната изградба на патека за тестирање автомобили.

Истражувачите рекоа дека ова укажува дека тие биле дел од програмите за принудна работа.

Volkswagen во времето на извештајот на Handelsblatt изјави дека претходно не знаел за какви било прекршувања на човековите права на патеката.