Фајзер очекува 26 милијарди долари заработувачка од вакцини

Американската фармацевтска групација Фајзер објави дека очекува да продаде 1,6 милијарди дози вакцини против инфекција со ковид-19, во вредност од 26 милијарди американски долари.

На крајот на февруари, компанијата процени дека ќе продаде вакцини за околу 15 милијарди долари до крајот на годината. Во меѓувреме, Фајзер потпиша дополнителни договори, меѓу другото, и со Европската комисија.

Компанијата во вторникот објави дека се постигнати договори со Канада и Израел за обезбедување вакцини по оваа година, како и за преговори со голем број други земји.

Вкупните приходи на Фајзер годинава се очекува да бидат помеѓу 70,5 и 72,5 милијарди долари, во споредба со претходно предвидените 59,4 и 61,4 милијарди.

Компанијата продаде вакцини за 3,5 милијарди долари во првиот квартал.

Нето добивката на компанијата се зголеми за 45 проценти на 4,9 милијарди евра, додека акциите во електронското тргување пред отворањето на берзата на Вол Стрит пораснаа за 1,3 проценти.