Економијата со раст од 3,4%: До крајот на годината ќе биде и над 4% – очекува премиерот

Бруто домашниот производ, во вториот годинешен квартал бележи годишен раст од 3,4 насто, објави Државниот завод за статистика. Со ова движење Македонија, во европски рамки, е само позади Ирска и Кипар. А, на исто рамниште е со Хрватска, со која го дели третото место, нагласи премиерот Христијан Мицкоски.

Статистиката покажува дека во второто тримесечје поголем раст е забележан во неколку сектори. Најголем исчекор, од 7,3 проценти, има во градежништвото. Трговијата на големо и трговијата на мало; поправката на моторни возила и мотоцикли; транспорт и складирање; објекти за сместување и сервисни дејности со храна бележат шестпроцентен раст. А, 3,9 насто е зголемувањето кај рударство и вадење на камен; преработувачка индустрија; снабдување со електрична енергија, гас, пареа и климатизација; снабдување со вода; отстранување на отпадни води, управување со отпад и дејности за санација на околината.

Финалната потрошувачка на домаќинствата, вклучувајќи ги и непрофитните институции кои им служат на домаќинствата, во тој период регистрираат номинален расте од 6,1 насто. Нејзиното учество во структурата на БДП е 68,5 проценти.

Воедно, извозот на стоки и на услуги номинално е зголемен за 6,4 насто. Паралелно, увозот во номинален износ е повисок за 7,3 насто.

Според сезонски и календарски прилагодените податоци, стапката на раст на бруто-домашниот производ во второто тримесечје од 2025 година во однос на второто тримесечје од 2024 година е 3,2 проценти – наведуваат од ДЗС, при што меѓу главните поенти издвојуваат дека „бруто-инвестициите бележат пораст, главно, поради зголемувањето на бруто-инвестициите во основни средства“.

До крајот на годинава, растот треба да ја надмине границата од четири проценти, смета премиерот.

„Ова е веќе четврти квартал кога имаме раст на бруто-домашниот производ од повеќе од три проценти. Првиот квартал на оваа влада беше третиот од минатата година, кога имавме раст од 3 проценти, па во четвртиот 3,2 проценти, па во првиот од оваа година 3,2 проценти и сега е 3,4 проценти. Очекувам до крајот на годината да имаме и квартал кога ќе ја пробиеме границата од над 4 проценти, со што уште еднаш ќе ги демантираме конструкциите и лагите на опозициските партии дека на економијата не ѝ одело добро“, дециден е Мицкоски.