ЕБРД и Комерцијална банка со нови еден милион евра за кредити за енергетски ефикасни домови

Комерцијална банка и Европската банка за обнова и развој ќе ги поддржат еколошките инвестиции на граѓаните во Северна Македонија со нови еден милион евра, кредит обезбеден преку Програмата на ЕБОР за финансирање зелена економија – GEFF.

Средствата ќе бидат достапни за физички лица за инвестиции во домот со цел заштеда на енергија, како што се изолација, прозорци, топлотни пумпи, соларни панели и други решенија. По успешна реализација на инвестицијата, корисниците ќе имаат право на грант во износ до 20% од вредноста на кредитот или на проектот. Средствата за грантовите се обезбедени од Европската унија.

„Кредитите понудени од кредитната линија GEFF досега се одлично прифатени од нашите клиенти и за краток период бележиме значајна побарувачка за овој атрактивен еколошки производ. Ова е дополнителен доказ дека овој вид поддршка на домаќинствата за имплементирање зелени технологии е неопходен и важен“, изјавија од Комерцијална банка Скопје.

Заклучно со февруари 2022 година, Програмата за поддршка на инвестиции во зелена енергија (GEFF) во Северна Македонија е искористена од скоро 2.700 домаќинства во износ од 20 милиони евра. Најчесто финансирани технологии се прозорците, вратите, изолацијата и топлотните пумпи. Комерцијална банка се приклучи на оваа програма во 2020 година и веќе има поддржано инвестиции во енергетска ефикасност во износ од еден милион евра.

„Ни претставува задоволство што го градиме успешното партнерство со Комерцијална банка АД Скопје и што ја зголемуваме нашата поддршка на инвестиции во енергетска ефикасност во земјата. Инвестициите во енергетска ефикасност имаат повеќекратни бенефити. Тие придонесуваат за намалување на сметките за електрична енергија на граѓаните, но и за намалување на производството и потрошувачката на електрична енергија во земјата, и конечно за намалување на емисиите на јаглероден диоксид“, изјави Анди Аранитаси, претставник на ЕБОР во Северна Македонија.

Кредитната линија GEFF за Западен Балкан, поддржана од ЕУ-Програмата за инвестиција во Западен Балкан и од Австриското федерално министерство за финансии, е дел од Регионалната програма за енергетска ефикасност за Западен Балкан. Целта на програмата е да го поддржи регионот во насока на подобрување на енергетската ефикасност во секторот на домување, кој е еден од најголемите потрошувачи на енергија. ЕБОР е главен институционален инвеститор во Северна Македонија и до денес има инвестирано над 2,2 милијарди евра во 154 проекти, а приоритет е поддршката на зелената енергија.