БУЏЕТОТ УСВОЕН, в година ќе се трошат 6,5 милијарди евра

Вкупни приходи од 358,8 милијарди, расходи од 400,2 милијарди денари и буџетски дефицит во апсолутен износ од 41,3 милијарди денари, што претставува четири проценти од планираниот БДП – пратениците му дадоа виза на Буџетот 2025. Развоен со социјална компоненета за власта, нереален, нималку развоен, недомаќински, предизборен… за опозицијата.

„Идната 2025 ќе биде година на инвестиции кои ќе дадат додадена вредност и ќе го откочат тркалото, ќе не искачат на едно скалило погоре во остварување на повисоки стапки на економски раст. Инвестиции кои создаваат реални услови за градење на една подобра иднина, а кои ќе имаат и значајно позитивно влијание врз економската активност во наредната година“, рече министерката за финансии, Гордана Димитриеска-Кочоска, која нагласи дека ќе има промени во политиките во насока на фискална консолидација, обезбедување фискална одржливост и поддршка на економскиот раст.

Карактеристика на овој буџет, според Министерството за финансии, е понискиот тренд на раст кај расходите во однос на трендот на раст на приходите. Односно проeктираниот раст на приходите е 13%, а кај расходите за 10% во однос на 2024 година, што пак придонесува кон консолидација и намалување на буџетскиот дефицит за околу 3,3 милијарди денари.

„За реализација на развојната компоненета со Буџетот се планирани 47,2 милијарди денари или со околу 4,6% учество во БДП на годишно ниво, што ќе овозможи создавање предуслови за нов циклус на економски раст.

Со Буџетот се обезбедуваат средства за редовна исплата на плати, пензии кои истовремено ќе бидат зголемени за 2.500 денари од март 2025 година, за исплата на социјална права, како и за редовно сервисирање на обврските.

Растот на економијата со Буџетот е проектиран на 3,7%, додека инфлацијата на 2,2%“, наведуваат од Министерството за финансии.

Инаку, во текот на амандманската расправа не беше прифатен ниту еден амандман поднесен од опозицијата, од каде што беа упатени критики дека од начинот на кој е скроена државната каса за идната година се гледа дека власта не се грижи за граѓаните, туку за елитата. Според пратениците опозиционери, овој досега најголем буџет од 6,5 милијарди евра е буџет на нови долгови и нова изгубена година за граѓаните и економијата.