Audi и Porsche ќе се приклучат на Формула 1

Премиум брендовите на Фолксваген, Ауди и Порше, ќе се приклучат на Формула 1 откако ќе ја убедат германската автомобилска групација дека потегот ќе донесе повеќе пари отколку што ќе чини, изјави во понеделникот главниот извршен директор на Фолксваген, Херберт Дис, јавува Ројтерс.

Дискусиите на бордот на директори за плановите на двете марки создадоа одредени поделби, рече Дис на настан во Волфсбург, каде што е седиштето на германскиот производител на автомобили. Но, на крајот, брендовите, кои покрај кинескиот бизнис на Фолксваген се најважните извори на приход на групацијата, потврдија дека ќе привлечат повеќе пари за Волфсбург со обврска во Формула 1 отколку без таква, според Дис. „На крајот ви снемува аргументи“, рече тој.

Веќе неколку месеци се шпекулира дека двете марки преговараат за партнерства за да влезат во највисоката класа на меѓународни трки со мотори, во која во поголемиот дел од последната деценија доминира германскиот ривал на Фолксваген, Мерцедес. Дис во понеделникот рече дека подготовките на Порше за влез во Фомула 1 се малку поодминати од оние на Ауди.

Ауди е подготвен да понуди околу 500 милиони евра за да влезе заедно со британскиот производител на луксузни спортски автомобили Мекларен, изјави извор за Ројтерс во март, додека Порше има намера да воспостави долгорочно партнерство со тркачкиот тим Ред Бул.

Покрај економскиот аргумент на брендовите, високото рекламно влијание на Формула 1 беше очигледно исто така убедливо. Дис рече дека како резултат Порше ќе ги намали другите тркачки активности и ќе се концентрира повеќе на таа патека.
Одлуката доаѓа додека Фолксваген се подготвува за можна котизација на Порше АГ во четвртиот квартал од оваа година, иако изворите велат дека влегувањето во Формула 1 трките најверојатно ќе се случи дури за неколку години.