Лукаревска:Санкции за фирми што манипулирале и не исплатиле февруарски плати

2 апр. 2021 г.2 мин читање777 прегледи

Вкупно 6.888 работници не земале плата за февруари годинава. Причина е финансиската неможност на фирмите да исплатат плати поради кризата, дел од тие работодавачи чекаат на помошта од петтиот пакет мерки кој е заглавен во Собранието.

Директорката на Управата за јавни приходи Сања Лукаревска рече дека за тој месец пресметка за плата е доставена за 63.948 вработени, но од нив овие 6.888 воопшто не земале плата. За тие за кои ќе се увиди дека не исплатувале и претходните месеци и има оправдана причина ќе се достават опомени но и блокирања, за останатите ќе има толеранција само поради неусвоениот пакет мерки во кој е предвидена и субвенција за исплата на платите за месеците февруари и март.

„Доставени се опомени, телефонски се контактираат, за тоа како може да се изменаџираат. Толеренцијата ќе зависи од моментот кога ќе се донесат економските мерки. Онаму каде се утврдени злоупотреби и каде сме утврдиле дека не исплаќале плати ќе има санкции, рече Лукаревска.

Таа денеска на прес конференција зборуваше за износот кој фирмите треба да го вратат од земените субвенции за исплатите на платите во минатата година со претходните пакети.