Комерцијална банка повторно ќе овозможи тргување со акции без провизија на „Инвеститорскиот ден“ на Македонската берза

И оваа година Комерцијална банка активно ќе се вклучи во настанот „Инвеститорски ден“ на Македонската берза на 13.09.2022 година (вторник) и на домашните физички лица ќе им овозможи да купуваат или продаваат акции без плаќање провизија за брокерски услуги кон Банката.

На „Инвеститорскиот ден“, кој оваа година се организира по трет пат, сите домашни физички лица ќе можат да купат или продадат кои било акции без да ги платат провизиите кон Берзата, ЦДХВ и овластените пазарни учесници (банки и брокерски куќи) што се вклучени во оваа иницијатива, при што ќе треба да бидат исполнети следните услови:

• Инвеститорите да склучат нормални трансакции со акции преку БЕСТ системот, со посредство на некоја од подолу наведените членки на Берзата;
• Износот на остварениот дневен промет по индивидуален инвеститор да не изнесува повеќе од 10.000 евра, независно од бројот на берзански трансакции преку кои истиот ќе биде остварен;
• Трансакциите да бидат склучени преку клиентска, односно сопственичка сметка.

Иницијативата за настанот „Инвеститорски ден“ ја прифатија и во неа активно се вклучија Централниот депозитар за хартии од вредност, сите десет членки на Берзата и ЦДХВ, а истата доби поддршка и од Комисијата за хартии од вредност.