За јакнење на почетниот капитал „Опфолио“ ќе издаде нова емисија акции

„Опфолио“ ќе ја издаде втората емисија акции по пат на приватна понуда, во вредност од 230 илјади евра. На овој начин ќе го зголеми почетниот капитал.

Информацијата ја сподели Комисијата за хартии од вредност, од каде што компанијата доби одобрение за новата емисија.

„Комисијата за хартии од вредност донесе Решение со кое на Друштвото за информатичка технологија, инвестиции и советодавни услуги ‘Офполио’ АД Скопје му даде одобрение за издавање на долгорочни хартии од вредност по пат на приватна понуда. Станува збор за втора емисија на 2000 обични акции со поединечна продажна вредност по акција од 115 евра, односно со вкупен износ на емисијата од 230.000 евра“, стои во известувањето.

Исто така, се наведува дека емисијата е во функција на зголемување на основната главнина со нови влогови што ќе се реализира со издавањето акции за однапред познати купувачи.

„Со приватната понуда, друштвото прибира средства заради подобрување на финансиската стабилност, за успешно покривање на тековните оперативни активности и за зголемување на потенцијалот за нови инвестициски можности“, се вели во објавата на КХВ.

„Опфолио“ е релативно нова фирма, која на пазарот делува од 2021 година. Според официјалните податоци, има скромни почетоци со приходи кои во првата година изнесуваат 421.372 денари (нецели седум илјади евра), за лани да достигнат 4.768.676 денари (над 77 илјади евра). Првата добивка од работењето ја оствариле минатата година – 3.593.026 денари (58,4 илјади евра).

Од 2022 година Друштвото е ориентирано кон инвестиции во акции.