За граѓаните „Инвеститорски ден“ на Берзата: Тргување без трошоци

Денес граѓаните можат да купуваат и да продаваат акции без дополнителни трошоци. Тоа е можно во рамките на настанот „Инвеститорски ден“, што годинава по четврти пат го организира Македонска берза.

За заинтересираните поединци тоа значи дека можат да тргуваат со акции на сите пазарни сегменти, но без трансакциските трошоци што вообичаено ги наплатуваат овластените пазарни институции и учесници – Берзата, ЦДХВ, банките и брокерските куќи што се вклучени во оваа иницијатива.

Условите кои треба да се запазат предвидуваат: трансакциите да се склучени преку БЕСТ системот, со посредство на некоја од членки на Берзата; износот на остварениот дневен промет по индивидуален инвеститор да не е над 10.000 евра, без оглед на бројот на трансакции; трансакциите да се склучени преку клиентска, односно сопственичка сметка.

На овој начин се стимулира учеството на граѓаните, односно на домашните инвеститори поединци, на македонскиот пазар на хартии од вредност. Со цел да вложуваат во акции издадени од македонските компании што се тргуваат на Македонска берза. А, преку тоа, да се зголеми нивото на знаење за овој вид финансиски инструменти и да се подобри инвестициската култура.

Во „Инвеститорскиот ден“ се вклучени десетте членки на Берзата – „Еурохаус“, „Илирика Инвестментс“, „Инвестброкер“, „Иново Брокер“, Комерцијална банка, НЛБ банка, Стопанска банка, ТТК банка, „Фершпед брокер“ и Шпаркасе банка.

Иницијативата е поддржана и од Комисијата за хартии од вредност.