За Денот на македонските рудари: Бучим донира 40.000 евра за Здравствениот дом Радовиш

Бучим и Боров Дол го одбележаа Денот на македонските рудари – 28 август, кој е симбол на трудот, посветеноста и истрајноста на рударите. Во чест на празникот, Бучим најави донација за Здравствениот дом во Радовиш. Со 40 илјади евра ќе се обезбеди целосна дигитализација на рендген машината. А тоа ќе овозможи побрза и поефикасна здравствена услуга, со што компанијата уште еднаш ја потврдува својата посветеност кон подобрување на квалитетот на живот за локалната заедница. На свеченоста присуствуваа премиерот Христијан Мицкоски,  соработници и претставници на локалната заедница.

Сите вработени во компанијата и оваа година добија парични награди за својот придонес во успехот, а 24 најуспешни беа одликувани со дополнителни бонуси како признание за нивните извонредни резултати, труд и посветеност. Наградите и признанијата се дел од стратегијата на „Бучим“ за вреднување на човечкиот капитал како најважен ресурс во рударството.

Од оваа година Бучим и Боров дол ќе бидат една компанија која се стреми да гради одржлива рударска приказна.

„Со претстојното припојување на Боров Дол кон Бучим започнуваме ново поглавје во македонското рударство. Градиме стабилна и одржлива компанија која не е насочена единствено кон производството, туку и кон луѓето – вработените и заедницата. Се залагаме за создавање на средина во која секој вработен ќе работи безбедно, ќе има можност за професионален развој и ќе придонесува кон трајна вредност за идните генерации“, рече во своето обраќање, заменик генералниот директор на Бучим и Боров Дол, Ивица Карапетров.

Радовиш и Бучим секоја година на 28 август потсетуваат на историскиот штрајк на рударите во Лојане во 1929 година – чин што остави длабока трага во борбата за достоинство и работнички права, и кој претставува вечен потсетник дека рударството е дел од идентитетот и културното наследство на македонскиот народ.

Прославата беше заокружена со концерт на групите „Нокаут“ и „Дивље Јагоде“ во центарот   на   Радовиш,   со   што   празникот   доби   и   културна   димензија,   обединувајќи   ја заедницата во духот на почит и благодарност кон рударите.