ЗА АКЦИОНЕРИТЕ НА „МАКЕДОНСКИ ТЕЛЕКОМ“ 36 МИЛИОНИ ЕВРА: Исплата на дивидендата од 26 септември

Акционерите на „Македонски телеком“ дивидендата за успешно завршената 2023 година ќе ја добијат на крајот од месецов. На 26 септември старува исплатата на бруто износот од 2.212.067.762 денари или речиси 36 милиони евра. Износите се пресметуваат врз утврдените  25,65 денари по акција.

Од МТ информираат дека акционерите – физички лица парите ќе ги добијат на трансакциските сметки, на кои и лани им била извршена уплата по таа основа.

Од компанијата им порачуваат на новите акционери, македонски резиденти, како и на оние кои сакаат дивидендата да им биде исплатена на сметка различна од минатата година, да достават податоци за активна трансакциска сметка и копија од лична карта најдоцна до 11 месецов на IR@telekom.mk или по пошта на адреса на Македонски Телеком АД – Скопје „Кеј 13-ти Ноември“ бр. 6, 1000 Скопје, Република Северна Македонија, со назнака: До Сектор за контрола, сметководство и даноци.

Истиот рок и наведените адреси се однесуваат и за правните лица – македонски резиденти, како и за странските правни и физички лица. Притоа, странските правни лица треба да достават и потврда за резидентен статус заверена од надлежниот даночен орган на државата од каде што доаѓаат, и тоа најдоцна еден ден пред исплатата на дивидендата, односно до 25 септември.

Странските физички лица, пак, имаат обврска да приложат единствен даночен број (ЕДБ) за нивна даночна регистрација во Република Северна Македонија, најдоцна до 11 септември.

До износот на дивидендата и до поделбата на парите се доаѓа откако телекомуникациската компанија лани не само што ги задржа стабилните пазарни позиции, туку забележа и раст во скоро сите сегменти, остварувајќи добивка од 33,77 милиони евра.

Во акционерската структура со 51 отсто се издвојува „Каменимост комуникации“, додека македонската Влада поседува 34,81 процент. Во нејзина сопственост е и единствената златна акција.