Во првото тримесечје БДП се зголемил за 1,2 проценти

Во првото годинешно тримесечја бруто-домашниот производ се придвижил за 1,2 проценти.

Поголем пораст од 19,6 насто, според проценетите податоци на Државниот завод за статистика, има кај секторите уметност, забава и рекреација; други услужни дејности; дејности на домаќинствата како работодавачи; дејности на домаќинствата кои произведуваат разновидна стока и вршат различни услуги за сопствени потреби. Понатаму, 7,5 проценти е зголемувањето во стручните, научни и технички дејности; како и во административните и помошни услужни дејности. Додека во трговија на големо и трговија на мало; во поправка на моторни возила и мотоцикли; во транспорт и складирање; и во објекти за сместување и сервисни дејности со храна, забележаниот раст е за 6,9 проценти.

Финалната потрошувачка на домаќинствата вклучувајќи ги непрофитните институции кои им служат на домаќинствата во првиот квартал номинално расте за 4,8 насто, а нејзиното учество во структурата на бруто-домашниот производ изнесува 72 отсто.

Во истиот период, според Статистика, извозот на стоки и на услуги номинално е намален за 6 проценти, а увозот на стоки и на услуги забележа зголемување во номинален износ од 0,5 насто.

Бруто-инвестициите во првото тримесечје од годинава имаат зголемување во делот на бруто инвестициите во основни средства (во машините и опремата и во транспортната опрема) и кај промената на залихите.