Во мај издадени 317 дозволи за градба, во Скопскиот регион за 186 нови станови

Во мај се издадени 317 одобренија за градење, што е за 1,9 отсто помалку во однос на истиот месец од претходната година, покажуваат податоците од Државниот завод за статистика.

Предвидената вредност на објектите, пресметано според издадените одобренија, изнесува 5.311.942 илјади денари или 86 милиони евра. Тоа е за 23,4 насто повеќе споредено со истиот месец лани.

Статистиката вели дека од вкупниот број издадени дозволи за градба, 137, односно 43,2 проценти се за објекти од високоградба, а 119 или 37,5 отсто за објекти од нискоградба. За реконструкција на објекти се доделни 61 или 19,3 проценти од одобренијата.

Од вкупно 317 објекти, на 142 (44,8%) како инвеститори се јавуваат физички лица, а на 175 (55,2%) објекти инвеститори се деловни субјекти.

Од регионален аспект, најмногу дозволи се издадени во Скопскиот – 76, каде што е предвидена изградба на 186 станови со површина од 15.687 метри квдратни, а најмалку во Североисточниот регион – 15.

Од ДЗС посочуваат дека во извештајниот период е предвидена изградба на 675 станови, со вкупна корисна површина од 54.646 метри квадратни.