Уште еден интернет гигант си оди од Кина: Amazon го повлекува Kindle од кинескиот пазар

Компанијата Амазон соопшти дека од четврток ќе престане да ги снабдува продавниците во Кина со своите е-читачи Kindle и ќе ја затвори својата е-книжарница Kindle во земјата следната година. Ова е најново повлекување од американска технолошка фирма од рестриктивниот кинески пазар.

Амазон ја објави одлуката на својата официјална WeChat сметка во четвртокот. Не наведе конкретна причина, но рече дека „го прилагодува стратешкиот фокус на своето работење и дека другите нејзини деловни линии во Кина ќе продолжат“. Електронската книжарница „Киндл Кина“ ќе престане да продава е-книги од 30 јуни следната година, се вели во извештајот, иако клиентите ќе можат да продолжат да преземаат купени книги уште една година. Исто така, Амазон ќе ја отстрани апликацијата Kindle од кинеските продавници за апликации во 2024 година, се додава.

Ројтерс во декември минатата година објави за длабоките децениски напори на Амазон да добие наклоност во Пекинг за да го заштити и развие својот бизнис во Кина.
Бизнисот со Kindle се обиде да се прошири во Кина, пишува Ројтерс, цитирајќи интерен документ на Амазон од 2018 година, во кој се вели дека до крајот на 2017 година, Кина станала најголемиот глобален пазар на Kindle, „сочинува 40%+ од нашиот светски обем на продажба на уреди“.

Амазон се придружува на долгата линија на западни интернет компании, вклучувајќи ги Linkedin, Yahoo и Airbnb Inc, кои ги прекинаа услугите или целосно се повлекоа од Кина во последните месеци, во услови на владини напори да ја заостри контролата врз онлајн содржината и новите закони насочени кон споделување податоци и приватност на клиентите.