Уни банка: На секундарниот пазар се тргува перпетуалната обврзница од третата емисија

Перпетуалната обврзница од третата емисија е котирана и со неа може да се тргува на секундарниот пазар на Берзата, информираат од Уни банка. Одлуката за котација на подсегментот Берзанска котација-Котација на други хартии од вредност, ја донесе минатата недела Одборот на директори на Македонска берза.

„Перпетуалните обврзници издадени од УНИ Банка АД Скопје се хибриден финансиски инструмент со специфични карактеристики, кој за прв пат се појави на домашниот пазар на хартии од вредност во 2019 година. Специфичните карактеристики на овој финансиски инструмент произлегуваат од тоа што овие хартии од вредност немаат рок на достасување, можноста издавачот да ја откаже исплатата на камата во било кое време, како и од можноста издавачот, целосно или делумно, да ја намали номиналната вредност на обврзниците, доколку настанат определени околности“, пишува во известувањето.

Оттаму, од Одборот на директори посочуваат дека овие обврзници примарно се наменети за „инвеститори кои имаат доволно знаење и искуство за вложување во вакви финансиски инструменти, односно треба да се има предвид наведеното во иницијалниот проспект за котација на првата емисија од овие хартии од вредност“.

Се работи за некумулативни, неконвертибилни, преносливи, субординирани, необезбедени, перпетуални (трајни) обврзници, со фиксна каматна стапка. Издадени се 1.350, со номинална вредност од илјада евра, при што вкупната номинална вредност на емисијата е 1.350.000 евра. Се издаваат по пат на приватна понуда и немаат рок на достасување. Каматната стапка е фиксна – 6% за првите пет години, а по истекот на тој период 8%. Ќе се исплаќа полугодишно, на 24 април и на 24 октомври секоја година, почнувајќи од 2024. Каматата се пресметува во евра, а се исплаќа во денари, по среден курс на НБРСМ на денот на исплатата.

Подетални информации за котацијата се објавени на официјалните интернет страници на Македонска берза и на Уни банка.