ТТК банка ќе дели дивиденда по 61 денар за акција – Утврден датумот за исплата

Дивидендата за успешно одработената 2024 година за акционерите на ТТК банка ќе се пресметува по 61 денар за акција. Ќе се дели бруто-износ од 63.023.553 денари или 1,02 милиони евра. Исплатата ќе почне на петти мај.

Одлуката е донесена на вчера одржаното акционерско Собрание. Притоа, одредена е висината на бруто-дивиденда по акција која е 6,1 отсто од номиналната вредност од 1.000 денари.

ТТК банка лани оствари добивка од 1,76 милиони евра. Делот од 45.233.884 денари, односно 735,5 илјади евра оди во резерви. А, 4.106.728 денари, што претставува 66,8 илјади евра се распределуваат за награди на членовите на Надзорниот одбор и за плата по основ на деловна успешност на менаџментот и на лицата co посебни права и одговорности. Распоредот на средствата, наведено е во одлуката, го прави Одборот за наградување на членовите на Надзорниот одбор, Надзорниот одбор и Управниот одбор.