Трошоците растат, јуни може да се „врзе“ со 60.325 денари

Минималната кошничка бележи нов месечен напредок – во споредба со мај, поскапа е за 235 денари. Во јуни за живот се потребни 60.325 денари. Математиката е направена врз база на најосновните потреби што ги има просечно четиричлено семејство, кое живее во сопствен дом. Во спротивно, ако опцијата е изнајмен стан од 60 квадрати, тогаш вкупните месечни трошоци се повисоки за дополнителни 15.375 денари, пресметале во Сојузот на синдикатите на Македонија.

Најголемата тежина во кошничката доаѓа од храната и пијалаците. Тие зафаќаат високи 36,4 проценти, или 21.952 денари, колку што се потребни во јуни.

Понатаму, за облека и обувки мора да се издвојат 4.962 денари, за станарина, вода, електрична енергија и греење – 6.014 денари, за лична хигиена и одржување на хигиена во домот 1.827 денари, за здравје 1.069 денари и за транспорт 4.871 денар.

Неопходните давачки продолжуваат со 3.240 денари за комуникација, за рекреација и култура 4.378 денари, за образование 7.022 денари, за ресторани и хотели 3.890 денари, а за останати стоки и услуги уште 1.100 денари.

Од почетокот на годинава, кога минималата синдикална кошница стартуваше со 57.163 денари, се бележи зголемување за 3.162 денари, иако потребите на просечното четиричлено семејство се исти.