Титан Усје: Акционерите ќе одлучуваат за две зделки со заинтересирани страни

Титан Усје ќе реализира две зделки од по максимум 16 милиони евра со Шаррцем Ш.П.К. од Косово и со Титан Глобал Финансе ПЛЦ. Предлогот даден од Одборот на директорите треба да биде усвоен од акциониерите на вонредното Собрание закажано за таа цел, кое ќе се одржи на 30 септември.

Предлог одлуката за одобрување на зделки со заинтересирани страни предвидува продажба, односно купување цемент, петрол кокс и клинкер од Шаррцем Ш.П.К., „чија поединечна или кумулативна вредност за секој производ посебно, за период од денот на донесувањето на оваа одлука до одржување на следното годишно собрание, ќе надмине износ од 9.200.000 евра, што претставува надминување на 10% од вредноста на активата на друштвото определена врз основа на последните ревидирани финансиски извештаи“.

И вредноста на заемот што ќе се даде на Титан Глобал Финансе ПЛЦ, како што е наведено, ќе надмине износ од 9,2 милиони евра, но не повеќе од 16 милиони, „што претставува надминување на 10% од вредноста на активата на друштвото“.

Поради тоа што предложените зделки ја надминуваат законски утврдената граница од 10 отсто од вредноста на активата, обезбедено е мислење од овластен ревизор, во согласност со Законот за трговски друштва. Акционерите ќе го имаат на увид тоа мислење пред да гласаат за одобрување на предлогот.