„ТИЕ ГО ФРЛААТ ВО МОРЕТО, ЈУЖНИОТ ВЕТЕР НИ ГО НОСИ“: Дубровчани ги чистат плажите од тони пластично ѓубре кое по Јадран стасало од Албанија

Тони отпад, главно пластика и стиропор, но и крупни објекти како стари фрижидери, допловиле вчера до старото градско пристаниште во Дубровник, еден од бисерите на хрватскиот и светски туризам, по невремето проследено со силен ветер и големи бранови. Плажите во стариот град се преполни со голема количина ѓубре и пластика, а судејќи според етикетите, поголемиот дел од него доаѓа од Албанија, јави Дубровачки Дневник.

Денес доброволци и лица ангажирани од дубровничката општина чистеа илјадници килограми отпад од една од најпознатите плажи на Дубровник, плажата Бања, покажува видеото што денес го објави весникот.

„Големи поздрави од Албанија, а во морето има уште ѓубре како во приказна. Бања е полна“, објави еден жител на социјалните мрежи, со опис на фотографиите.

Проблемот, велат тие, не е нов и се повторува, а тоа е меѓународно прашање кое било дискутирано кога биле утврдени чекорите што ќе се преземат за негово решавање. Сепак, очигледно е дека проблемот не е целосно решен.

(Фото: Banja Beach, Dubrovnik, Wikimedia Commons)