Ти се капеш во украдените пари од граѓаните, јас достоинствено работам – Заев му одговори на Груевски

„Јас жеден да сум, Русија капка вода нема да ми даде, а камоли бизнис да ми даде“ – е одговорот на Зоран Заев на наводите од Никола Груевски дека соработува со руски компании, прави големи пари и во суштина „ја финансира војната во Укранина, но не Украина“. Како што вели, да ја одлежел Груевски казната, ќе можел сега од Македонија да зборува пред јавноста. Двајцата поранешни премиери се „допишуваат“ преку социјалните мрежи.

„Можеше да ја одлежиш казната, тоа малку што ти го дадоа, бидејќи да бев јас некој друг и да се мешав во правосудството, ти ќе добиеше многу повеќе. Но, јас не сум како тебе и твоите, јас сепак се борев за слободна и демократска Македонија.

Да ја одлежеше тогаш казната и да покажеше достоинство кон народот на Македонија, денес ќе можеше од тука, од Македонија, да зборуваш пред нашата јавност, наместо од бегство да пишуваш епопеи… 

Груевски од Будимпешта: Заев прави пари со Русите, а на Филипче од каде му 550.000 евра

За разлика од тебе, неуспешниот и поразен ‘боксер’, ние пред политиката се занимававме со сопствена работа, и тоа успешно. А сега, кога скоро пет години сум во политичка пензија, нема ден да не ме спомнете. Толку ли комплекси сте си натовариле?

За разлика од тебе, којшто се капеш во украдените парите на граѓаните на Македонија, јас достоинствено работам и своето време и натаму ќе го трошам на работа, а не на серијали писанија посветени на тебе. Тоа значи дека ова е една од ретките прилики кога го добиваш повторно моето внимание“, вели Заев, завршувајќи со „До свидания Никола! Поздрав од Македонија, полноправна членка на НАТО“.