Што можат туристите да однесат во Грција без да пријават на царина?

Бидејќи во последните две години главните дилеми при патувањето беа главно поврзани со пандемијата, односно потребната здравствена документација – потврди за вакцинација или болест, негативни тестови и слично, туристите при преминувањето на границата заборавија на стандардните царински правила. А што и во колкава количина патниците можат да понесат со себе во Грција?

Патниците кои пристигнуваат со авион од земји кои не се членки на ЕУ, можат да донесат најмногу 200 цигари, четири литри вино или еден литар жесток пијалок и парфем во пакувања до 50 грама. Што се однесува до парите, дозволено е да се земат до 10.000 евра во готовина (или еквивалентна сума на пари во друга валута). Секоја поголема сума мора да се пријави на граница, пишува biznis.rs.

Патниците кои доаѓаат по пат од земји кои не се членки на ЕУ можат да донесат 40 цигари, 20 пури или 50 грама тутун, еден литар жесток пијалок (појако од 22 отсто алкохол), два литра вино и 50 грама парфем. Готовината е исто така ограничена на 10.000 евра.

Цигари, антиквитети, даски за сурфање…

Дозволениот внес на цигари по патник е максимум 200 парчиња (една штека) кога се работи за повисоката граница или 40 цигари (две кутии) кога важи долната граница. Во пракса навистина се случуваше грчките цариници да направат проблем, најчесто на почетокот и на крајот на сезоната кога имаат доволно време да го проверат внесот на цигари и забранета храна. Тогаш се повикуваа на оваа долна граница, но во многу случаи не прашуваа за цигари, ниту пак пребаруваа автобуси и автомобили.

Забрането е внесување растенија со земја во Грција. Отстранувањето на антиквитети е забрането без специјална дозвола на Археолошката служба во Атина, а против секој што ќе ја игнорира оваа регулатива ќе биде поведена кривична постапка. Една даска за сурфање по лице може да се увезе/извезе без царина, доколку е запишана во пасошот при пристигнувањето.

Цените на транспортот растат

И покрај тоа што повеќето туристи очекуваа дека летниот одмор годинава ќе им биде порелаксиран поради подобрата епидемиска состојба, војната во Украина има прилично големо влијание врз туризмот, во вид на повисоки цени и потежок транспорт. Затоа често туристичките агенции се принудени на патниците да им наплаќаат повисока цена од договорената – од 10 до 15 евра за автобус и 30 евра за авионски превоз.

Патарина во Грција

На околу 500 метри од преминот Евзони на влезот во Грција се наоѓа првата наплатна рампа каде патарината за моторни возила е 1,80 евра, во еден правец. На наплатната рампа кај обиколницата Солун патарината за автомобили е 0,50 евра, за мотоцикли 0,30 евра, а за возила со или без приколка и висина поголема од 2,70 метри едно евро.

Патарината на Аспровалта чини 0,60 евра за мотоцикли, 0,90 евра за автомобили и до 3,20 евра за големи возила. Понатаму, од Солун до Атина има 11 наплатни рампи, а вкупната патарина е 31,35 евра.

Список на цени во одморалиштата

лежалки – во зависност од локацијата – бесплатно со пијачка, или од три до 120 евра по комплет
гиро – од 2,5 до четири евра
скара – од шест до 14 евра
кафе – од две до шест евра
домашно пиво – од три до 4,5 евра
сок – од три до 5,5 евра
апартмани – од 22 евра по лице