Штериева за „Каде се парите?“: Нема доволно добри проекти кои можат да го соберат целиот банкарски потенцијал 

Има добри проекти. Но нема доволно добри проекти и компании кои би можеле да го соберат целиот потенцијал на нашиот банкарски сектор, оценува претседателката на Македонската банкарска асоцијација, Маја Стевкова Штериева, која гостува на поткастот „Каде се парите?“.

„Не е битно за колку милијарди денари зборуваме. Битно е колкава е стапката на конверзија од депозитите во кредити, коефициент на кредити наспроти депозити. Колку е депозитната база искористена за кредити. Кај нас тоа периодично варира, но никогаш не била над 80-90 проценти како во многу земји“, вели Штериева.

Тоа е така, посочува, затоа што банките сакаат да имаат контрола над ризикот.

„Тоа не е некоја замислена категорија – сакам да го контролирам ризикот. Тоа значи, ако некој не го врати кредитот, ние сме презеле поголем ризик. Не би сакале од профитот да се носи толку многу во резерви… Тоа покажува дека тие пари се одобрени кредити, но не ја оствариле својата економска функција. Сме го одобриле, но не бил добро искористен и парите се како во бунар фрлени. Тоа не е идеја на ниеден банкар. А секогаш би сакале повеќе да кредитираме“.