СТАРТУВА НОВОГОДИШНАТА КОШНИЦА: над 960 производи поевтини за 10 проценти

Млеко, леб, месо, риба, грицки, слатки, пијалаци… речиси илјада намирници спакувани во новогодишната кошница, од денес треба да се поевтини за барем десет проценти. Опфатени се артикли кои најчесто се застапени на новогодишната и на празничната трпеза, а целта е да се олесни товарот на граѓаните.

Станува збор за повеќе од 960 производи од 90 производители и дистрибутери. Ќе можат да се купат во над 300 продажни места во рамките на 30-те синџири на маркети.

„Очекуваме граѓаните овие новогодишни празници да ги поминат со пониски цени и да заштедат на домашниот буџет“, изјави заменик министерот за економија и труд, Марјан Ристески.

Граѓаните не се уверени дека поевтино ќе ги минат празниците. Пред сѐ, поради тоа што претходните денови беа сведоци на нови поскапувања. Повисоки цени имаат одредени видови сувомесни и млечни производи, јајцата, зеленчукот… Поскапи се и маслото за јадење и кафето, но тие заедно со какаото и шеќерот не се застапени во кошницата. Како што вели Ристески, изоставени се за компаниите да не претрпат поголеми загуби, поради цените на суровините на светските берзи кои во моментов се многу високи.

Кога се промовираше новогодишната кошница и премиерот и министерот за економија најавија дека граѓаните ќе бидат заштитени, доколку се потврди дека цените се зголемувале во периодот пред старот на оваа мерка. Воедно, посочија дека во улогата на инспектори треба да бидат и потрошувачите.

И Ристески вчера упати повик до граѓаните и до синдикатите да ги следат цените и најави дека Државниот пазарен инспекторат постојано ќе биде на терен. Сепак, смета дека нема да има игри, бидејќи оваа мерка е предлог од компаниите и од маркетите.

„Апелирам компаниите доследно да ја почитуваат акцијата која што самите ја креираа, а доколку граѓаните имаат забелешки, да ги пријават до Државниот пазарен инспекторат на бесплатниот телефонски број 191 или на веб-страницата www.dpi.gov.mk“, напиша Ристески на социјалните мрежи.

Новогодишната кошница има едномесечен рок на траење – од 15 декември до 15 јануари.