Станарите во Њујорк вкупно должат над милијарда долари неплатена кирија

Станарите во Њујорк вкупно должат над милијарда долари неплатена кирија, oва го покажуваат резултатите од истражувањето, пишува „Волстрит журнал“ (WSJ).

Износот на овој долг е последната потврда дека надоместоците за невработеност и претходните федерални пакети за стимулации не биле доволни за ублажување на растечкиот финансиски товар на неплатените закупнини што притискаат илјадници домаќинства во оваа метропола, наведува весникот.

Организациите што ги претставуваат земјопоседници и станари силно лобираат за зголемена државна помош за кирии за време на пандемијата.

Истражувањето, спроведено од група сопственици на куќи од Програмата за подобрување на домувањето (ХИП), се фокусираше на зградите во Њујорк кои подлежат на законите за закуп на градот. Апартманите во овие згради сочинуваат околу половина од вкупните станови за изнајмување во Њујорк.

Студијата, заснована врз собраните одговори на земјопоседници, проценува дека дури 185.000 домаќинства што живеат во овие станови доцнат повеќе од два месеци со исплатата на киријата, а просечниот долг надминува 6.000 долари.

Ayеј Мартин, извршен директор на ХИП, вели дека долгот за закупнини во преостанатите згради во Њујорк, кои не биле опфатени со истражувањето, веројатно е ист или поголем, што значи дека вкупниот долг на станарите во Њујорк се чини дека надминува две милијарди долари.