СО ЗГОЛЕМЕНА ПРОДАЖБА НЕМА КРИЗА: Макстил лани остварил профит од 17,5 милиони евра

Позитивни резултати во услови на нестабилен пазар на челик постигна скопски Макстил АД. Нето добивката од 17,5 милиони евра е остварена во период на економска несигурност, зголемена инфлација, раст на цените на енергенсите… проследено со страв од рецесија. Сите препреки се совладани со навремена координација и менаџирање на деловните активности, а пред се со вештото ползување на сопствената пазарна позиција во регионот, во Турција и ЕУ.

Во текот на минатата година приходите од работењето се во износ од 182,6 милиони евра (11,25 милијарди денари). Главна улога тука има продажбата, која во структурата на вкупните приходи учествува со дури 98,6 отсто. Споредено со истиот период од 2021, остварените приходи од работењето се натфрлени повеќе од двојно – за 54,6 проценти.

Кога се зборува за расходите, податоците од Макстил покажуваат дека лани изнесувале 156,5 милиони евра или 9,64 милијарди денари. Во однос на 2021 година, расходите се повисоки за 63 насто, што, пак, најмногу се должи на зголемениот обем на производство на готовиот производ, како и зголемувањето на трошоците на влезните материјали и енергенси, особено на природниот гас и струјата. Растот на цените на енергенсите повлекол и поскапувања на сите други потребни материјали.

Добивката пред оданочување во извештајниот период е 19,7 милиони евра, односно 1,2 милијарди денари, додека нето добивката изнесува 17,5 милиони евра (1,07 милијарди денари). Сумите се повисоки од остварената во 2021 година.

Сепак, поради пренесени загуби од претходниот период, лани компанијата не поделила дивиденда.

Гледано преку производните реултати, лани производството било поголемо од она во 2021. Кај производството на дебели лимови од 303.288 тони има зголемување од околу 11 насто, а во однос на поставениот производен план натфрлувањето е за речиси 10 насто. Реализацијата  на топловаланите дебели лимови е 291.352 тони и тука има петпроцентно зголемување. Единственото потфрлање е регистрирано во производството на сопствен челичен полуфабрикат, челичански слабови – од 21 отсто.

Компанијата лани имала инвестиции во погоните Челичарница и Валавница. Исто така, била извршена ресертификација на ИСО 9001 – Стандардот за управување со квалитет, успешна надзорна проверка за сертификатот ИСО 14001 – Стандардот за управување со животната средина, како и успешна проверка согласно стандардот МКС EN 13242, а се вовел Системот за безбедност и здравје при работа – ИСО 45001. Вкупниот вложен износ за инвестиции е 2,6 милиони евра (161,5 милиони денари).

Освен грижата кон вработените, кои лани добиле зголемување на платите и максимален износ на регрес за годишен одмор, компанијата поддржала и повеќе проекти од општествен интерес, при што најзначајно е реновирањето на Онколошкиот оддел при ЈЗУ Клиниката за детски болести.