„СКОПСКИ ПАЗАР“ ГО ЗАОКРУЖИ НА 90.000 БРОЈОТ НА АКЦИИ ОД „Македонијатурист“

Во четири дена – пет објави за случени промени во сопственоста на „Македонијатурист“. Повторно „Скопски пазар“ и „М.Г. Фешн“ се подновиле со нови количини ации, а овојпат, информација со таква содржина има и за „Чезакомерц“.

Со последно купените 186 акции, најголемиот акционер поседува 19,9 проценти.

„Известуваме дека акционерот Скопски пазар акционерско друштво за услуги во прометот и трговијата увоз-извоз Скопје купи дополнителни 186 акции и сега поседува 90.000 акции односно 19,90% од вкупниот број обични акции издадени од Македонијатурист АД“, преку Македонска берза соопштија од хотелско-угостителската компанија .

„М.Г. Фешн“ сопственоста ја подигна до 11,4 проценти, обезбедени со 51.577 акции што ги има во моментот. Во информацијата пишува дека „Друштво за трговија, производство и услуги М.Г. Фешн доо увоз-извоз Скопје купи дополнителни 432 акции и сега поседува 51.577 акции односно 11,40%…“.

Во новата структура на „Македонијатурист“ најнизок е процентот што е во посед на „Чезакомерц“, фирма која се сткнала со 16 нови акции:

„…Акционерот Друштво за внатрешен и надворешен промет Чезакомерц Симеон Роберто и Виктор доо Скопје купи дополнителни 16 акции и сега поседува 28.691 акции односно 6,34%“, наведено е во објавата од „Македонијатурист“.

Претходно, на 28 јануари инвеститорската јавност беше информирана дека „Скопски пазар“ купи 450, а „М.Г. Фешн“ 233 акции.

Интересот за акциите на компанијата се согледува преку берзанските активности. Во текот на последната работна недела забележани се три блок-трансакции, од кои најголема е таа од 30 јануари. Од страна на познат(и) купувач(и) платени се 140 илјади евра за 859 акции. Чија единечна цена е 10 илјади денари.

На официјалниот пазар во петокот, просечната вредност на акцијата била 10.600 денари. Истргувани се 233 акции со дневен промет од 2.469.810 денари или над 40 илјади евра.