„Скопски пазар“ цврсто гази во „Македонијатурист“ – купи уште 3.042 акции

Скопски пазар систематски ги јакне позициите во „Македонијатурист“. Најголемиот акционер се стекнал со нова количина акции и сега поседува 19,73 проценти од хотелско-угостителската компанија. Тоа не е единствената промена во сопственоста. Акции купува и „Промедика“.

„Согласно член 38 став 2 од Правилата за котација на Македонска Берза АД Скопје, известуваме дека акционерот Скопски пазар акционерско друштво за услуги во прометот и трговијата увоз-извоз Скопје купи дополнителни 3.042 акции и сега поседува 89.208 акции односно 19,73% од вкупниот број обични акции издадени од Македонијатурист АД“, информираат од компанијата преку Македонска берза.

Во втората објава со инвеститорската јавност се споделува информацијата за новиот сопственички статус на „Промедика“.

“…Известуваме дека акционерот Друштво за трговија, производство и услуги Промедика дооел Скопје купи дополнителни 1.667 акции и сега поседува 51.771 акциja односно 11,45% од вкупниот број обични акции издадени од Македонијатурист АД“.

Крупни промени се случија последниве месеци во „Македонијатурист“, во кои до скоро најголемиот акционер, Доне Таневски, почна да ги продава своите акции, сведувајќи го својот удел на 48.364 обични акции, односно на 10,69 проценти.

Акционери со повеќе од пет проценти од акциите се и Симеон Павлов со 10,47% и неговата фирма „Чеза комерц“, која поседува 6,21% од вкупниот број обични акции издадени од „Македонијатурист“.