СКАПО ЛЕТО ВО ГРЦИЈА: Новите сообраќајќни правила не простуваат ни возење со папучи – казните достигнуваат и до 1.500 евра

Во пресрет на летната сезона 2025 година, грчката сообраќајна полиција значително ги зголеми контролите на патиштата, со акцент на почитување на безбедносните прописи и задолжителната опрема во возилата. Според информациите од повеќе извори, туристите ова лето се посебно под лупа, а казните за дури и најмали прекршоци може да достигнат суми кои сериозно го нарушуваат буџетот за одмор.

Највисоката казна, која достигнува дури 1.500 евра, е предвидена за возачите кои пушат цигара во возило во кое се наоѓа дете помладо од 12 години. Според важечките прописи, ова се смета за сериозно загрозување на здравјето на малолетниците и за ваквиот прекршок нема ниту толеранција, ниту можност за намалување на казната. Дополнително, во случаи на повторено прекршување, може да дојде и до одземање на возачката дозвола на самото место.

Контролите се спроведуваат секојдневно, а најчесто санкционираните прекршоци се поврзани со задолжителната опрема. Според прописите, во секое патничко возило мора да има исправен противпожарен апарат од типот S2 (со капацитет од 2 килограми), комплет за прва помош со важечки рок на траење, сигурносен триаголник, резервна гума или сет за итна поправка на гума, како и рефлектирачки елек кој мора да се наоѓа во кабината на возилото, на дофат на возачот. Казните за недостаток или неисправност на било кој од овие елементи изнесуваат 100 евра по прекршок.

Исто така, често се казнува и возење во папучи или сандали без соодветна потпора, што се смета за небезбедно управување со возило. За вакви случаи, казната изнесува 50 евра. Непочитување на другите основни прописи, како на пример неупотреба на сигурносен ремен на задните седишта, непочитување на семафори или користење мобилен телефон без hands-free систем, исто така носат значителни финансиски последици, со казни кои варираат од 100 до 700 евра, а во одредени случаи и повеќе.

Оваа година, дополнително се воведени и нови забрани во туристичките области, како дел од поширока кампања за заштита на животната средина и јавниот ред. Пушењето на јавни плажи, паркови и во близина на училишта е забрането и казнето со 114 евра, без разлика дали се работи за турист или локален жител. Исто така, употребата на паметни уреди, вклучувајќи паметни часовници, за време на возење е забранета и исто така ќе биде санкционирана.

Сообраќајните експерти и здруженија за безбедност на патиштата предупредуваат дека „незнаењето не е изговор“ и апелираат до возачите темелно да се информираат за грчките прописи пред да се упатат на патување.

Иако грчките власти тврдат дека мерките се воведени исклучиво со цел зголемување на безбедноста на сите учесници во сообраќајот, дел од туристите ги доживуваат овие политики како начин за дополнително полнење на државниот буџет преку санкционирање на недоволно информирани возачи.

Сепак, пораката е јасна: летниот одмор не треба да започне со финансиски шок. Деталната проверка на возилото пред патување, запознавање со важечките закони и внимателното возење се клучни за безгрижен и безбеден престој во Грција. Инаку, и најмал пропуст може да чини скапо – не само во пари, туку и во нарушено патничко искуство.