РУСКАТА НАФТА ГО ИСФРЛА ДОЛАРОТ ОД ИГРА: Газпромбанк се договори со Индија за трговијата рупија-рубља

Руската Газпромбанк ги прошири своите врски со банките во Индија за да ја поттикне трговијата меѓу двете земји во национални валути, изјави во понеделникот клучен извршен директор. Овој потег доаѓа во време на зголемена трговија меѓу двете земји, при што Русија стана најголемиот снабдувач на нафта за Индија оваа година.

„Работевме напорно за да го воспоставиме нашето ниво на партнерство со индиските банки и нашите претставници овде работеа напорно“, изјави Елена Борисенко, заменик-претседател на управниот одбор на Газпромбанк на маргините на настанот за бизнис дијалог меѓу Индија и Русија во Њу Делхи. „Сега имаме инфраструктура, имаме плаќања од банки … тоа е многу подобро отколку што беше пред три месеци“, додаде таа.

Газпромбанк е трета по големина банка во Русија по средства и клучен канал на руската енергетска трговија. Поради повисоките набавки на нафта, трговскиот биланс се повеќе се навалува во корист на Русија. Таа рамнотежа може да се подобри преку руските компании кои ќе инвестираат во инфраструктурни проекти во Индија, рече Борисенко. „Се надеваме дека [трговијата] ќе биде подобра, ќе се подобрува и плаќањата меѓу Русија и Индија ќе бидат се повеќе и повеќе во национални валути“, рече Борисенко.

Индија минатата година спроведе поширока рамка за олеснување на трговијата во странство во рупии и оттогаш многу странски банки, вклучително и Газпромбанк и други руски институции, отворија сметки со индиски банки.