Русија со девизни и златни резерви во јуани, САД го предупредуваат Пекинг да не ги крши санкциите

Русија изјави дека банкарската соработка со Кина ѝ овозможува да ги издржи осакатувачките економски санкции поставени од западните земји поради војната во Украина, откако Соединетите Американски држави го предупредија Пекинг да не обезбедува помош за оваа држава. Рускиот министер за финансии Антон Силуанов денес изјави дека санкциите ја лишиле Москва од пристапот до 300 милијарди долари од нејзините 640 милијарди долари златни и девизни резерви и додаде дека има притисок врз Пекинг да ги затвори.

„Држиме дел од нашите златни и девизни резерви во кинеска валута, во јуани. И гледаме каков притисок се врши од западните земји врз Кина за да се ограничи меѓусебната трговија со Кина. Се разбира, постои притисок да се ограничи пристапот до тие резерви“, изјави рускиот министер за финансии. „Но, мислам дека нашето партнерство со Кина сепак ќе ни овозможи да ја одржиме соработката што ја постигнавме, и не само да ја одржуваме, туку и да ја зголемиме во средина каде што западните пазари се затвораат“.

Западните земји воведоа санкции без преседан врз корпоративниот и финансискиот систем на Русија откако таа ја нападна Украина на 24 февруари во, како што ја нарекува, специјална воена операција. Коментарите на Силуанов во ТВ интервју ја означија најјасната изјава досега од Москва дека ќе побара помош од Кина за да го ублажи ефектот.

Но, директорот на американската Агенција за државна безбедност, НСА, Џејк Саливан, изјави дека Вашингтон ја предупредил Кина да не го дава тоа. „Директно, приватно комуницираме со Пекинг, дека апсолутно ќе има последици доколку продолжат напорите за затајување или продолжи поддршката на Русија да ги надмине санкциите“, рече Саливан за Си-Ен-Ен.

„Нема да дозволиме тоа да оди напред и да дозволиме да има спас за Русија од овие економски санкции од која било земја, каде било во светот“, додаде Саливан, кој во понеделник треба да се сретне со највисокиот кинески дипломат Јанг Јиечи во Рим.

Кинеско-руски врски

Кина е една од ретките земји што избегнува да ги критикува Русите за нивната инвазија на Украина. Кинескиот претседател Кси Џинпинг беше домаќин на рускиот претседател Владимир Путин за отворањето на Зимските олимписки игри во Пекинг само неколку недели пред Русија да ја започне инвазијата на 24 февруари.

За време на посетата на Путин на Кина минатиот месец, двајцата лидери издадоа изјава од 5.000 зборови во која изјавија „нема ограничувања“ во пријателството меѓу двете земји.

Кинеските власти, исто така, рекоа дека Вашингтон не треба да може да се жали на дејствијата на Русија бидејќи САД го нападнаа Ирак под лажни изговори. САД тврдеа дека имаат докази дека Садам Хусеин складирал оружје за масовно уништување иако никогаш не било пронајдено. Кина е најголемиот извозен пазар на Русија по Европската унија. Според кинеската царинска агенција, рускиот извоз во Кина бил вреден 79,3 милијарди долари во 2021 година, а нафтата и гасот сочинуваат 56 отсто од тоа.