Русија ја повика Кина да се откаже од доларот во нивната меѓусебна трговија

Мора да се откажеме од употребата на меѓународни платни системи контролирани од Западот, изјави рускиот министер за надворешни работи Сергеј Лавров кој е во дводневна официјална посета на Кина. Лавров ги нарече санкциите на Западот против Кина и Русија „неразумни“, додавајќи дека одговорот на двете нации треба да биде соработка.

„Мора да ги намалиме ризиците од санкции со зајакнување на нашата технолошка независност, преминување кон плаќања во наши национални валути и глобални валути кои служат како алтернатива на (американскиот) долар“, рече шефот на руската дипломатија, пренесува South China Morning Post. Пред неговата посета, кинескиот „Глобал тајмс“ оцени дека посетата на Лавров е знак за тоа колку е блиска кинеско-руската координација за да се намали влијанието на „проблематичниот САД“.

Според рускиот министер, во светот треба да се формира широка коалиција на земји кои се против против унилатералните санкции на САД. „Животот нè принудува да ја градиме нашата линија во економскиот и социјалниот развој на таков начин што не зависиме од каприците на нашите западни партнери“, рече Лавров, пренесува Интерфакс.

Тој посочи дека не е во ред да се казнува во кое било време во современата меѓународна арена и обидот за воведување такви правила на Русија и Кина го нарече „едноставно неразумен“. „Кина е вистински стратешки партнер и вистински истомисленик за нас, и нашата соработка на меѓународно ниво игра стабилизирачка улога во глобалната и регионалната ситуација“, рече Лавров, пренесува Синхуа.

Во заедничкиот документ потпишан од Москва и Пекинг се вели дека човековите права се универзални, неделиви и меѓусебно поврзани. Исто така, се наведува дека меѓународното право е камен-темелник на развојот на човечкото општество. Рускиот министер за надворешни работи изјави дека целата инфраструктура на односите на Русија со Европската унија е уништена со еднострани активности на Брисел, па затоа Москва сега нема никакви односи со таа организација.