Реката Треска мора да се заштити од отпадот, загадувањето и дивоградбите

Зајакнување на инфраструктурата за третман на отпадните води, имплементација на системите за уравување со отпад и модернизација на комуналните услуги, но и јакнење на јавната свест и зголемувањето на мониторингот се само некои од препораките на најновата студија за состојбата на реката Треска. Документот под наслов „Младинскиот активизам за одржлива река: Заштита и промоција на биодиверзитетот на реката Треска“, го изработи невладината Аналитика во соработка со канадската Амбасада, и во него се документирани заканите и влијанијата врз реката Треска, како и на состојбата во која се наоѓа оваа притока на Вардар и нејзиниот жив свет. „Студијата ќе биде од голема полза и исклучително значење за Министерството за животна средина и просторно планирање бидејќи досега не е направена вакво истражување за оваа река, изјави Ане Лошкоска, заменик министерката за животна средина.

Таа посочи дека, во овој момент Министерството односно неговиот сектор за води работи на изработка на слична студија за течението на реката Вардар, неговото речно корито, биодиверзитетот и квалитетот на водата.

Со оглед дека беше неопходно да се изврши прилагодување на македонското законодавство со она на Европската унија во делот на водите, информираше Лошкоска, Министерството е при крај со изготвување на новиот закон за води со кој правиме усогласување со европската регулатива, очекуваме тој брзо да биде и донесен.

Прашана што се превзема во врска со бројните диви депонии и дивоградби на крајбрежјето на реката Треска, заменик-министерката рече дека тие се контролираат од страна на инспекторатот за животна средина но дека се во надлежност и на градот и на општините, притоа апелирајќи во бoрбата против овие појави да се вклучат инспекторите од Град Скопје и од општините, а апелираше и до сите граѓани да покажат свест за зачувување на реката и нејзиното крајбрежје.

(Фото: Фејсбук)