Путин забрани увоз и извоз во одредени земји со цел да ја обезбеди руската индустрија

Рускиот претседател Владимир Путин потпиша указ за примена на посебни економски мерки во областа на надворешната трговија, кои се однесуваат на забрана за увоз и извоз на производи и суровини во одредени земји. Руската новинска агенција ТАСС јавува дека Путин наредил да се воведе забрана за земјите од списокот што го утврдила руската влада.

Тој, исто така, им нареди на министрите во рок од два дена да утврдат кои земји ќе бидат погодени од забраната. Путин изјави дека оваа одлука ја носи за посебни економски мерки со цел да се обезбеди непречено функционирање на индустријата.

Забраната за извоз и увоз во Руската Федерација, како што е наведено во уредбата, нема да влијае на производите и суровините што граѓаните ги користат за лични потреби. Западните санкции силно ги погодија жителите, кои сега се во страв од пораст на цените и губење на работните места, додека владата во Русија се обидува максимално да ги ублажи последиците од санкциите. Претседателот на руската Државна Дума, Вјачеслав Володин ја повика Владата и Долниот дом на рускиот Парламент да најдат решение за зачувување на работните места во Русија по заминувањето на западните компании.