Приходите од камати повисоки за 21%, добивката за 23% – Стопанска банка Скопје успешна во првото тримесечје

Солидни резултати и висока профитабилност е оценката на Стопанска банка Скопје по одработените први три месеци од годинава. Период во кој и натаму се присутни и домашни и глобални сериозни предизвици. Во такви услови најстарата македонска банка ги надминала досегашните остварувања.

На последниот ден од март забележана е добивка пред оданочување и резервации од 1.345.050 илјади денари, или 21,85 милиони евра. Тоа е за 17 насто повеќе од претходната година. Добивката, пак, пред оданочување е повисока за 23 проценти и изнесува 957.720 илјади денари, односно 15,56 милиони евра, додека чистиот профит е 861,948 илјади денари, над 14 милиони евра.

Скопската Стопанска банка постојано предничи во сумите што ги инкасира врз основа на наплатените камати. За три месеци во овој сегмент има натфрлување од 21 насто. Конкретно, се работи за нето-приход од 1.565.359 илјади денари (25,4 милиони евра). Во истиот лански период е запишана сума од 20,9 милиони евра. Од Банката посочуваат дека растот е резултат на кредитните активности и вложувањето на вишокот ликвидни средства во првокласни инструменти.

Пресметаните и наплатени провизии и надоместоци на Стопанска банка и донеле 213.431 илјада денари (3,46 милиони евра), а овде се работи за зголемување од три проценти. Најголемиот дел од тие средства се должат на реализираните услуги во платниот промет и во работењето со картички.

Исто така, од Банката се задоволни од постигнатата ефикасност во контролата на трошоците. Притоа, посочуваат дека останатите расходи од дејноста и трошоците за вработените достигнале 4,1, односно 4,5 милиони евра. И, за 11 насто се повисоки во споредба со истиот минатогодишен период..

„Одржувањето на квалитетот на кредитното портфолио и управување со кредитниот ризик е во приоритетните цели на Банката. Оттука, заклучно со крајот на првиот квартал од 2024 година, Банката издвои исправка на вредност на финансиските средства и посебна резерва за вонбилансна изложеност, на нето-основа, во износ од 387.330 илјади денари“, наведено е во коментарот даден кон неревидираниот финансиски извештај.

На крајот од првото тримесечје, вкупната актива на Стопанска банка изнесува 129.303.255 илјади денари, односно 2,1 милијарда евра.