ПРЕТСЕДАТЕЛКАТА НА ЕБОР ВО СКОПЈЕ, колку пари ќе има за инвестиции?

Средби со владини и со бизнис претставници ќе има претседателката на Европската банка за обнова и развој, Одил Рене Басо, во текот на денешниот и утрешниот ден. Ова е нејзина втора посета на Македонија, првата се реализира во мај.

Северна Македонија е значајна инвестициска дестинација за нас, се вели во соопштението на ЕБОР и се посочува дека досега се инвестирани 2,9 милијарди евра во 190 проекти.

Државата воспостави соработка со ЕБОР во 1993, две години по нејзиното формирање, со цел финансирање структурни проекти во поранешните социјалистички земји од Централна и Источна Европа и поддршка во нивната транзиција. Во тие рамки ЕБОР обезбедува финансирање за банките, индустриите и бизнисите. Во годините наназад, со средства е присутна во сите позначајни проекти што опфаќаат изградба или ревитализација на патната и железничката инфраструктура, за надградба на системот за воздухопловна навигација, во електроенергетскиот систем, пречистителни станици, зелени кредити… ЕБОР поддржува и претпријатија во државна сопственост, па така лани беа обезбедени 100 милиони евра за ЕСМ. Од досегашната соработка, единствено потфрлање има кај проектот за брз автобуски превоз во Скопје, за кој беа одобрени 70 милиони евра.

Се смета дека при последнава посета ќе стане збор и за најавените 750 милиони евра, што на Македонија и следуваат од пакетот со шест милијарди евра наменет за Западен Балкан. Реализацијата на првата транша ја одложија изборите во Европскиот парламент, па наместо во јуни, парите би требало да се стават на располагање во септември. Станува збор за првите 52,5 милиони евра. Инаку, парите кои треба да го забрзаат патот кон ЕУ на земјите од овој дел на регионот, ќе се користат во период од четири години.